本月主題︰四大天王
男人通常都唔鍾意黎明（係，四大天王入面都應該唔會鍾意郭富城嘅，但係九十年代有邊個唔梳佢個七一分界杜拉格斯頭先？反而黎明真係無嘢俾人跟），又唔Man，成個小白臉咁，唱歌又走音，都唔知有咩好﹗
據我所知，啲女人冧佢，都係源於「原振俠」呢套電視劇，覺得佢Cool得嚟又型喎。我淨係記得套劇有李嘉欣、朱茵同埋洪欣，加多個王靖雯（當年未改名嘅），為咗睇女我只好默默忍受黎明喺我面前懶型﹗
講番老黎嘅金曲，點都易記過佢啲金句嘅。「莎喲奶奶啊/ 莎喲奶奶啊/ 而為何心中總有情義在」呢首〈我的親愛〉係好典型嘅日系冧女歌，無咩內涵，但係我永遠都記得佢嗰個非常Cutie嘅Bye Bye手勢。點解咁深刻印象呢？事緣有次去佐敦飲嘢，有枱人點咗呢首歌嚟唱，一去到「莎喲奶奶啊」就突然幾個人企起身做番呢個舞姿，全場酒客笑到收唔到聲，下一輪副歌一出「莎喲奶奶啊」，其他幾枱都有人起身跟住跳……所以呢首歌係我心目中係好歡樂嘅。
如果要講老黎最令人記得嘅歌，一定係和記廣告歌啦。呢一系列廣告當年簡直係全城佳話，女主角阿May由不知名女Fans變為童愛玲、Lee Ann、全智賢、楊采妮到依家嘅徐子珊，好多金句都仲記到，例如話「Just to say hi」「May I have your number」「我係咪好任性呀？」大家以前係咪有講過先？至於廣告歌由慢歌〈如果可以再見你〉到快歌〈Sugar in the Mamaland〉都有，我個人就鍾意快歌，始終佢嘅慢歌係俾女聽，我唔啱。
其實老黎係一個好醒目嘅人，咁多年嚟不斷轉營，由情歌王子到Rave歌天王，然後進軍影壇，依家直情做生意捧新人。好多人話佢九唔搭八講金句，其實佢不知幾高章，答咗記者等於無答，但係記者又有嘢寫，兩全其美；話佢唔識捧人，簽咗啲人返嚟都紅唔起，其實衛蘭都不知幾成功，佢唱英文歌比廣東歌更有市場，起碼依家東南亞好多人識佢，JM唔覺唔覺成日出Event keep住曝光，又簽咗個後生版王力宏——李治廷。黎天王唔算親民，但係都咁多人支持佢，次次開Concert唔跳舞齋唱舊歌都大把人入場，就知佢係有啲諗頭嘅。
請大家跟住一齊跳﹗〈我的親愛〉
〈對不起，我愛你〉嘅重點……陳淑蘭係女主角囉。
一首妖妖地嘅歌，〈DNA出錯〉
